4.dbh-ko ikasleek EUSKARABENTURA ekimenaren inguruko informazioa jaso dute. Horretarako, Ane de la Presa Urturi etorri da, bera EuskarAbentura elkarteko kide da eta hau guztia koordinatzen duenetariko bat.

Euskal Herriko bazter ezberdinetako hamar gaztek osatzen dute elkartea eta ia hiru urtez aritu ziren, boluntario gisa, egitasmoari forma ematen, harik eta 2018ko uztailean lehenengoz argia ikusi zuen arte.

Hain justu, kide hauetako batzuek beren garaian Ruta Quetzal izeneko espedizio-sorta sonatuan parte hartu zuten; eta orduko hartatik gordetako oroitzapenetatik sortu zen horren ‘euskal aldaera bat’ martxan jartzeko ideia: EuskarAbentura.

Euskal Herriko zazpi lurraldeetako nahiz diasporako 16-17 urte bitarteko 130 neska-mutil euskal geografia, kultura eta historia lagunartean ezagutzera eramango dituen oinezko espedizioa da EuskarAbentura. Eta horren xehetasun batzuk eman dizkigu Anek.

Hainbat gune ezagun bisitatzeko aukera izango da; bai eta basoak, hondartzak, museoak, gari-soroak, leizeak, portuak, gazteluak, belazeak, monumentu nahiz eraikin enblematikoak, herriak, gatzagak, baserriak…  Era eta eduki anitzeko mintegi, tailer eta ekimenek ere aberastuko dute abentura. Izan ere, hainbat esparrutako profesionalak (musikariak, soziolinguistak, aktoreak, bertsolariak, kazetariak, dantzariak, idazleak, kirolariak…) aldiro-aldiro batuko dira espediziora gazteekin ordu batzuk konpartitu eta askotariko jakintzak elkar trukatzeko.

2005 edo 2006ean jaioa bazara eta euskaraz badakizu, anima zaitez eta izena eman!

Hona hemen webgunearen lotura helbidea:

LOTURA: https://euskarabentura.eus/